ഗൂഗിളിന്‍റെ ആവനാഴിയിലെ അസ്ത്രങ്ങള്‍

ഗൂഗിള്‍ നല്‍കുന്ന സേവനങ്ങള്‍ക്ക് കണക്കില്ല മിക്കവയും സൌജന്യം, ലോകത്തുള്ള മുഴുവന്‍ വിജ്ഞാനവും ഒറ്റകുടക്കീഴില്‍ കൊണ്ടുവരികയെന്ന ഗൂഗിളിന്‍റെ ലക്ഷ്യത്തിലേക്കുള്ള ചവിട്ടുപടികളാണ് ഓരോ സര്‍വ്വീസുകളുമെന്ന് ശ്രദ്ധിച്ചാല്‍ മനസ്സിലാകും, ഗൂഗിള്‍ സേവനങ്ങളില്‍ തിരഞ്ഞെടുത്തവ മാത്രമാണ് ഇവിടെ സൂചിപ്പിക്കുന്നത്.
ഗൂഗിള്‍ സെര്‍ച്ച് :-
വെറും സേര്‍ച്ചിങ്ങിന് മാത്രമല്ല ഒരാളുടെ ദൈനംദിന ജീവിതത്തിലെ ഒട്ടേറെ പ്രശ്നങ്ങള്‍ക്കുള്ള പരിഹാരം കൂടിയാണ് പ്രശസ്തമായ ഈ സെര്‍ച്ച് എഞ്ചിന്‍. ഗൂഗിള്‍ സെര്‍ച്ചിനെ നിങ്ങളുടെ നിഘണ്ടുവായും, കാല്‍ക്കുലേറ്ററായും, നാണയവിനിമയ വിവരകേന്ദ്രമായുമൊക്കെ അനായാസം ഉപയോഗിക്കാനാകും. ഏതെങ്കിലും ഒരു ഇംഗ്ലീഷ് വാക്കിന്‍റെ അര്‍ത്ഥമറിയണം എന്നിരിക്കട്ടെ ഗൂഗിളുണ്ടെങ്കില്‍ ഡിക്ഷണറി തേടേണ്ട കാര്യമില്ല. സെര്‍ച്ച് ബോക്സില്‍ define: എന്ന് ടൈപ്പ് ചെയ്തിട്ട് അര്‍ത്ഥമറിയേണ്ട വാക്കു കൂടി നല്‍കി സെര്‍ച്ച് ചെയ്യുക സെര്‍ച്ച് ഫലങ്ങളില്‍ ആദ്യത്തേത് ആ വാക്കിന്‍റെ അര്‍ത്ഥമായിരിക്കും.
സങ്കീര്‍ണ്ണമായ ഗണിത പ്രശ്നത്തിന് ഉത്തരം തേടണമെന്നിരിക്കട്ടെ, സെര്‍ച്ച് ബോക്സില്‍ ആ പ്രശ്നം നല്‍കിയാല്‍ ഗൂഗിള്‍ അതിന്‍റെ ഉത്തരം ഉടനെയെത്തിക്കും. നാണയങ്ങളുടെ മൂല്യം അറിയാനും ഗൂഗിള്‍ സെര്‍ച്ച് സഹായിക്കും ഉദാഹരണത്തിന് അഞ്ച് ബ്രിട്ടീഷ് പൌണ്ട് എത്ര ഇന്ത്യന്‍ രൂപയാണ് എന്നറിയണമെങ്കില്‍ ഗൂഗിള്‍ സെര്‍ച്ച് ബോക്സില്‍ '5 British Pounds in Indian Money' എന്ന് നല്‍കിയിട്ട് സെര്‍ച്ച് ചെയ്താല്‍ മതി നൊടിയിടയില്‍ ഉത്തരം മുന്‍പിലെത്തും.
സെര്‍ച്ച് ചെയ്യുമ്പോള്‍ ഏറ്റവും പ്രധാനപ്പെട്ട സൈറ്റ് മാത്രം മതിയെങ്കില്‍ സെര്‍ച്ച് ബോക്സിന് താഴെ കാണുന്ന 'I am Feeling Lucky' എന്ന സ്ഥാനത്ത് ക്ലിക്ക് ചെയ്യുക ഇതുകൊണ്ട് സമയം ലാഭിക്കാം. സെര്‍ച്ചിങ്ങിന്‍റെ കൂടുതല്‍ സാദ്ധ്യതകള്‍ അറിയാന്‍ 'www.google.com/help/basics.html/ സന്ദര്‍ശിക്കുക.
ഗൂഗിള്‍ ഇമേജ് സെര്‍ച്ച് :-
ഗൂഗിള്‍ ഹോംപേജില്‍ സെര്‍ച്ച് ബോക്സിന് മുകളില്‍ തന്നെ കാണാം ഇമേജുകളിലേക്കുള്ള ലിങ്ക്. ലോകമെങ്ങുമുള്ള ഇന്‍റര്‍നെറ്റിലെ 120 കോടിയിലധികം ചിത്രങ്ങളിലേക്കുള്ള പ്രവേശനമാണിത് വിലാസം 'www.images.google.com'
ഗൂഗിള്‍ ന്യൂസ്:-
മനുഷ്യരുടെ ഇടപെടല്‍ കൂടാതെ 4500ല്‍ അധികം വാര്‍ത്താസ്രോതസുകളില്‍ നിന്ന് അനുനിമിഷം സ്വയം നവീകരിക്കപ്പെടുന്ന ന്യൂസ് സര്‍വ്വീസ് ആണ് ഗൂഗിളിന്‍റേത്. ഇഷ്ടമുള്ള പ്രൊജക്‌ടുകള്‍ക്കായി ചെലവിടാവുന്ന 20 ശതമാനം സമയം ഉപയോഗിച്ച് ഗൂഗിളിലെ ഇന്ത്യക്കാരനായ കൃഷ്ണ ഭരത് എന്ന സോഫ്ട് വെയര്‍ എഞ്ചിനിയറാണ് ഗൂഗിള്‍ ന്യൂസ് രൂപപ്പെടുത്തിയത് 2001 സെപ്റ്റംബര്‍ 11ന് അമേരിക്കയിലുണ്ടായ ഭീകരാക്രമണമാണ് വാര്‍ത്തകള്‍ എവിടെ നിന്നായാലും സ്വയം എത്തുന്ന തരത്തില്‍ ഉള്ള ഒരു സോഫ്റ്റ് വെയറിനെ പറ്റിയുള്ള ചിന്ത കൃഷ്ണ ഭരതിന്‍റെ മനസ്സിലുണര്‍ത്തിയത് വിലാസം news.google.com.
ജിമെയില്‍ :-
2004 ഏപ്രില്‍ ഒന്നിനാണ് ഗൂഗിള്‍ അതിന്‍റെ ഇമെയില്‍ സര്‍വ്വീസ് ആയ ജിമെയില്‍ (GMail) അവതരിപ്പിച്ചത്. ആദ്യം ഗൂഗിളിലുള്ളവരും അവരുടെ ബന്ധുക്കളുമാണ് പരീക്ഷണാര്‍ത്ഥം ഉപയോഗിച്ചു തുടങ്ങിയത്. (മുമ്പ് ജിമെയില്‍ അക്കൌണ്ടുള്ള ഒരാള്‍ ക്ഷണിക്കണമായിരുന്നു. മറ്റൊരാള്‍ക്ക് അക്കൌണ്ട് തുറക്കാന്‍ ഇപ്പോള്‍ അതിന്‍റെ ആവശ്യമില്ല) മൈക്രോസോഫ്റ്റിന്‍റെ ഹോട്ട്മെയില്‍ വെറും രണ്ട് മെഗാബൈറ്റ് (MB) മാത്രം സൌജന്യസ്ഥലം അനുവദിച്ചിരുന്ന സമയത്ത് ആയിരം എം.ബി (1GB) സൌജന്യസ്ഥലം അനുവദിച്ചു കൊണ്ടാണ് ജിമെയില്‍ രംഗത്തെത്തിയത്, മാത്രമല്ല നിലവിലുണ്ടായിരുന്ന എല്ലാ ഇമെയില്‍ സര്‍വ്വീസുകളെയും പഴയ തലമുറയിലേക്ക് തള്ളി വിട്ടുകൊണ്ട് ലളിതവും അനായാസവുമായ ഒരു വെബ് ആശയവിനിമയ രീതി തന്നെ ജിമെയില്‍ നടപ്പിലാക്കി. സെര്‍ച്ചിങ്ങിന്‍റെ സാദ്ധ്യത എങ്ങിനെ ഇമെയില്‍ പോലുള്ള മേഖയിലും ഫലപ്രദമായി സന്നിവേശിപ്പിക്കാം എന്നതിന് ഉദാഹരണമാണ് ജിമെയില്‍ .
2001ലാണ് ജിമെയില്‍ രൂപപ്പെടുത്താന്‍ ഗൂഗിള്‍ ശ്രമമാരംഭിച്ചത്. പോള്‍ ബുച്ച് ഹെയിറ്റ് എന്ന സോഫ്റ്റ് വെയര്‍ എഞ്ചിനീയറായിരുന്നു. അതിനു പിന്നില്‍ ലാറി പേജും സെര്‍ജി ബ്രിനും ഉള്‍പ്പെട വെറും ആറ് പേരാണ് ആദ്യം ജിമെയില്‍ ഉപയോഗിച്ചിരുന്നത്. ഇന്ന് ഏതാണ്ട് 7 ജിഗാബൈറ്റായി ജിമെയിലിന്‍റെ സംഭരണശേഷി വര്‍ദ്ധിപ്പിച്ചിരിക്കുന്നു. മാത്രമല്ല. ഗൂഗിള്‍ ടോക്ക്സ്, ഗൂഗിള്‍ വീഡിയോ ചാറ്റ് എന്നിവ കൂടി സന്നിവേശിപ്പിച്ച് ജിമെയിലിന്‍റെ മൂര്‍ച്ച കൂട്ടാനും ഗൂഗിളിനായി. വിലാസം gmail.com
ഗൂഗിള്‍ എര്‍ത്ത് :-
സാധാരണക്കാരെ പോലും പര്യവേഷകരാക്കി മാറ്റാന്‍ സഹായിക്കുന്ന വെബ്ബ് സര്‍വ്വീസ് ആണ് ഗൂഗിള്‍ എര്‍ത്ത്. ത്രിമാന വിര്‍ച്വല്‍ ഭൂഗോളമാണത്. ഭൂമുഖത്ത് എവിടെ വേണമെങ്കിലും പറന്നിറങ്ങാനും ഭൂമിയുടെ ഏത് കോണും സ്വന്തം കമ്പ്യൂട്ടറിലൂടെ സന്ദര്‍ശിക്കാനും സഹായിക്കുന്നു. ഈ സോഫ്‌റ്റ് വെയര്‍ ഇന്‍റര്‍നെറ്റിന്‍റെയും മള്‍ട്ടിമീഡിയയുടെയും സാദ്ധ്യതകള്‍ക്ക് ഏത് അതിരുവരെ പോകാമെന്നതിന്‍റെ ഏറ്റവും നല്ല ഉദാഹരണമാണ്. കീഹോള്‍ (Keyhole) എന്ന കമ്പനിയാണ് ഗൂഗിള്‍ എര്‍ത്തിന്‍റെ പ്രാഥമിക രൂപം വികസിപ്പിച്ചത്. ആ കമ്പനി 2004ല്‍ ഗൂഗിള്‍ വിലക്കു വാങ്ങി. കീഹോളില്‍ പ്രവര്‍ത്തിച്ചിരുന്ന ചിക്കായി ഒഹാസാമയാണ് ഇപ്പോള്‍ ഗൂഗിള്‍ എര്‍ത്തിന്‍റെ മേധാവി. ഉപഗ്രഹങ്ങള്‍ പകര്‍ത്തുന്ന ഭൂമിയുടെ ത്രിമാന മാപ്പുകള്‍ ഗൂഗിള്‍ എര്‍ത്തില്‍ സന്നിവേശിപ്പിച്ചാണ് അതുല്യമായ ഒരു അനുഭവമായി അതിനെ മാറ്റുന്നത്. ഗൂഗിള്‍ എര്‍ത്തിന്‍റെ വിലാസം earth.google.com
ഗൂഗിള്‍ ഡെസ്ക്ക്ടോപ്പ് :-
നെറ്റില്‍ നിന്ന് വിവരങ്ങള്‍ തേടാന്‍ എളുപ്പമാണ്. ഒരു മികച്ച സെര്‍ച്ച് എഞ്ചിന്‍റെ സേവനം തേടിയാല്‍ മതി, പക്ഷേ ആയിരക്കണക്കിന് ഫയലുകളും ചിത്രങ്ങളും പാട്ടുകളുമൊക്കെ  ശേഖരിച്ചു വെച്ചിട്ടുള്ള പേഴ്സണല്‍ കംപ്യൂട്ടറില്‍ നിന്ന് എങ്ങനെയൊരു വിവരം കണ്ടെത്തും, കൃത്യമായി ഫോള്‍ഡറുകളുണ്ടാക്കി ഫയല്‍ ചെയ്തിട്ടുള്ള പേഴ്സണല്‍ കമ്പ്യൂട്ടറില്‍ നിന്നുപോലും ഒരു ഫയല്‍ കണ്ടെത്തുക ശ്രമകരം. അതിന് പരിഹാരമായി ഒരു ഡെസ്ക്ക്ടോപ്പ് സെര്‍ച്ച് 2006ല്‍ പുറത്തിറക്കുമെന്ന് മൈക്രോസോഫ്റ്റ് വര്‍ഷങ്ങള്‍ക്ക് മുന്‍പ് പ്രഖ്യാപിച്ചിരുന്നു. മൈക്രോസോഫ്റ്റിന്‍റെതാകുമ്പോള്‍ അത് കാശ് കൊടുത്ത് വാങ്ങേണ്ടി വരുന്ന ഉത്പന്നമായിരിക്കും എന്നാല്‍ മൈക്രോസോഫ്റ്റിനെ നടുക്കിക്കൊണ്ട് 2004 ഒക്‌ടോബറില്‍ ഗൂഗിള്‍ ഡെസ്ക്ക്ടോപ്പ് പുറത്ത് വന്നു. തികച്ചും സൌജന്യം ഗൂഗിള്‍ സൈറ്റില്‍ നിന്ന് ആര്‍ക്ക് വേണമെങ്കിലും നിമിഷം നേരം കൊണ്ട് ഡൌണ്‍ലോഡ് ചെയ്യാം. ഗൂഗിള്‍ ഉപയോഗിച്ച് എങ്ങിനെയാണോ വിവരങ്ങള്‍ സെര്‍ച്ച് ചെയ്യുന്നത് അതേ രീതിയില്‍ ഒരാള്‍ക്ക് സ്വന്തം കംപ്യൂട്ടറില്‍ വിവരങ്ങള്‍ കണ്ടെത്താം. വിലാസം : desktop.google.com.
ഗൂഗിള്‍ ബുക്ക് സെര്‍ച്ച് :-
ആദ്യം ഇത് 'ഗൂഗിള്‍ പ്രിന്‍റ്' എന്നാണ് അറിയപ്പെട്ടിരുന്നത് ഓണ്‍ലൈനിലുള്ള വിവരങ്ങള്‍ മാത്രമല്ല അല്ലാത്തവ കൂടി ഇന്‍റര്‍നെറ്റിന്‍റെ കുടക്കീഴിലെത്തിക്കാന്‍ ഗൂഗിള്‍ നടപ്പാക്കുന്ന ബൃഹദ്പദ്ധതിയാണിത്. ലോകത്ത് എല്ലാവിടെയും ഉള്ള ലൈബ്രറികളിലെ ലക്ഷകണക്കിന് പുസ്തകങ്ങള്‍ വെര്‍ച്വല്‍ രൂപത്തിലാക്കാന്‍ ഉദ്ദേശിച്ചുള്ള പദ്ധതി. ബുക്കുകള്‍ക്കുള്ളില്‍ കടന്ന് സെര്‍ച്ച് ചെയ്യാന്‍ കഴിയുന്ന സംവിധാനം. ലൈബ്രറികളുടെ ബൌദ്ധിക, ഭൂമിശാത്ര പരിമിതകളെ ഗൂഗിള്‍ ബുക്ക് സെര്‍ച്ച് മായ്ച്ചു കളയുന്നു. സ്റ്റാന്‍ഫഡ്, ഹവാര്‍ഡ്, മിഷിഗണ്‍ , ഓക്സ്ഫെഡ് സര്‍വ്വകലാശാലകളിലെ ലക്ഷകണക്കിന് ലൈബ്രറി പുസ്തകങ്ങളും, ന്യൂയോര്‍ക്ക് പബ്ലിക്ക് ലൈബ്രറിയും വിര്‍ച്വല്‍ രൂപത്തിലാക്കാനുള്ള ശ്രമമാണ് ഗൂഗിള്‍ ആദ്യം തുടങ്ങിയത്. ഇപ്പോള്‍ ദിവസവും 3000 പുസ്തകങ്ങള്‍ വീതമാണ് ഗൂഗിള്‍ സ്കാന്‍ ചെയ്യുന്നത്. അതനുസരിച്ച് പ്രതിവര്‍ഷം പത്ത് ലക്ഷം പുസ്തകങ്ങള്‍ വീതം ഡിജിറ്റല്‍ രൂപത്തിലാക്കാന്‍ ഗൂഗിളിനാകും. വിലാസം books.google.com

ബ്ലോഗര്‍ ഡോട്ട് കോം :-

വെബ്ബില്‍ ആത്മപ്രകാശനം നടത്താന്‍ വ്യക്തികളെ പ്രാപ്തമാക്കുന്നതാണ് ബ്ലോഗിങ്ങ്. ആര്‍ക്കും പ്രസാധകനും എഴുത്തുകാരനും എഡിറ്ററും ആകാം. സൌജന്യമായി ബ്ലോഗ് തുടങ്ങുവാനുള്ള അവസരമൊരുക്കുന്നു ഗൂഗിളിന് കീഴിയുള്ള ബ്ലോഗര്‍ ഡോട്ട് കോം. 'പൈറ ലാബ്സ്' എന്ന കമ്പനിയുടേയതായിരുന്നു ഈ സര്‍വ്വീസ്. ബ്ലോഗിങ്ങിന്‍റെ സാദ്ധ്യതകള്‍ മുന്‍കൂട്ടി മനസ്സിലാക്കിയ ഗൂഗിള്‍ 2003 ഫെബ്രുവരിയില്‍ ആ കമ്പനി വിലക്ക് വാങ്ങി. ഇന്ന് ഈ മേഖലയില്‍ ഏറ്റവും ലളിതവും ജനപ്രിയമായതുമായ സര്‍വ്വീസ് ആണ് ബ്ലോഗര്‍ . ആഡ്സെന്‍സിന്‍റെ സഹായത്തോടെ ബ്ലോഗറില്‍ നിന്ന് ലക്ഷകണക്കിന് ഡോളര്‍ വരുമാനവും ഗൂഗിള്‍ നേടുന്നു. വിലാസം: blogger.com
യൂട്യൂബ്:-
ടെക്സ്റ്റുകളും ചിത്രങ്ങളും ഉപയോഗിച്ച് മാത്രമല്ല വീഡിയോ കൊണ്ടും ബ്ലോഗിംഗ് സാദ്ധ്യമാകുമെന്ന് ലോകത്തിന് ബോദ്ധ്യപ്പെടുത്തി കൊടുത്ത ഇന്‍റര്‍നെറ്റ് സംരഭമാണ് യൂട്യൂബ് (YouTube) നിലവില്‍ വന്ന് ഒരു വര്‍ഷത്തിനുള്ളില്‍ അസാധാരണമായി ജനപ്രീതിയാര്‍ജ്ജിച്ച ആ സര്‍വ്വീസ്, സാധാരണക്കാര്‍ക്കു പോലും സംപ്രേക്ഷകരാകാന്‍ അവസരമൊരുക്കുന്നു. 165 കോടി ഡോളര്‍ (7425 കോടി രൂപ) നല്‍കിയാണ് ഗൂഗിള്‍ യൂട്യൂബിനെ സ്വന്തമാക്കിയത്. വിലാസം youtube.com
ഓര്‍ക്കുട്ട് :-
ലക്ഷകണക്കിന് ആളുകള്‍ക്ക് എളുപ്പത്തില്‍ ബന്ധപ്പെടാനും സൌഹൃദവും ആശയങ്ങളും പങ്കുവെക്കാനുമുള്ള സോഷ്യല്‍ കമ്മ്യൂണിറ്റി ശൃഖലയാണ് 'ഓര്‍ക്കുട്ട്' ഇതിന് രൂപം നല്‍കിയ ഗൂഗിളിലെ തുര്‍ക്കിക്കാരനായ എഞ്ചിനീയര്‍ ഓര്‍ക്കുട് ബുയുക്കോക്റ്റെന്‍റെ പേരിലാണ് ഈ നെറ്റ് വര്‍ക്ക് അറിയപ്പെടുന്നത്. ഗൂഗിളില്‍ ഇഷ്ടപ്പെട്ട പ്രോജക്‌ടില്‍ ജോലി ചെയ്യാവുന്ന 20 ശതമാനം സമയമുപയോഗിച്ചാണ് ബുയുക്കോക്റ്റെന്‍ ഈ സര്‍വ്വീസ് രൂപ്പെടുത്തിയത്. മുന്‍പ് ജോലി നോക്കിയിരുന്ന 'അഫിനിറ്റി എഞ്ചിന്‍സ്' എന്ന സ്ഥാപനത്തില്‍ വെച്ച് യൂണിവേഴ്സിറ്റി അലുമിനി ഗ്രൂപ്പുകള്‍ക്കായി 'ഇന്‍സര്‍ക്കിള്‍ ' (InCircle) എന്നൊരു സോഫ്റ്റ് വെയര്‍ ബുയുക്കോക്റ്റെന്‍ രൂപപ്പെടുത്തിയിരുന്നു. അതിന്‍റെ ചുവട് പിടിച്ചാണ് 'ഓര്‍ക്കുട്ട്' വികസിപ്പിച്ചത്. 2004 ജനുവരി 22ന് യാതൊരു കോലാഹലവുമില്ലാതെ വെബ്ബില്‍ പ്രത്യക്ഷപ്പെട്ട ഈ നെറ്റ് വര്‍ക്കിലെ അംഗസംഖ്യ 2004 ജൂലായ് ആയപ്പോഴേക്കും പത്ത് ലക്ഷം കടന്നു. 2010 ഒക്‌ടോബറിലെ കണക്ക് പ്രകാരം 100 മില്യണില്‍ മേലെ ഉപഭോക്താക്കള്‍ ഇന്ന് ഉണ്ടെന്നാണ് വ്യക്തമാക്കുന്നത്. അതില്‍ 48 ശതമാനം ബ്രസീലില്‍ നിന്നും, 39.2 ശതമാനം ഇന്ത്യയില്‍ നിന്നും, 2.2  ശതമാനം അമേരിക്കയില്‍ നിന്നുമാണ്. വിലാസം : orkut.com
ഗൂഗിള്‍ ബ്ലോഗ് സെര്‍ച്ച് :-
ഇന്‍റര്‍നെറ്റില്‍ ഓരോ ദിവസവും പ്രത്യക്ഷപ്പെടുന്ന ലക്ഷകണക്കിന് ബ്ലോഗുകളിലേക്ക് ആവശ്യക്കാര്‍ക്ക് എത്താനുള്ള കുറുക്ക് വഴിയാണ് 'ഗൂഗിള്‍ ബ്ലോഗ് സെര്‍ച്ച്'. വിലാസം : blogsearch.google.com
ഗൂഗിള്‍ പേറ്റന്‍റ് സെര്‍ച്ച് :-
70 ലക്ഷത്തിലധികം പേറ്റന്‍റുകളുടെ വിശദാംശങ്ങള്‍ ഉള്‍ക്കൊള്ളുന്ന ബ്രഹത്തായ മറ്റൊരു ഡേറ്റാബേസ് ആണിത്. കണ്ടുപിടുത്തങ്ങളുടെ അത്ഭുത ലോകത്തേക്കും അവയുടെ വിശദാംശങ്ങളിലേക്കും ഒരാള്‍ക്ക് ഈ സര്‍വ്വീസ് വഴി എളുപ്പത്തില്‍ പ്രവേശിക്കാനാകും. വിലാസം : google.com/patents.
ഗൂഗിള്‍ സ്കോളര്‍ :-
ഒരു ഗവേഷകനെ സംബന്ധിച്ചിടത്തോളം ഗൂഗിള്‍ സെര്‍ച്ച് എഞ്ചിനില്‍ നിന്ന് ലഭിക്കുന്ന സാധാരണ വിവരങ്ങള്‍ അയാളുടെ ഗവേഷണത്തെ അത്രയധികം സഹായിച്ചെന്നു വരില്ല ആ പരിമിതി മറികടക്കാനുള്ളതാണ് 'ഗൂഗിള്‍ സ്കോളര്‍ ' ലക്ഷകണക്കിന് ഗവേഷണ പ്രബന്ധങ്ങളാണ്. ഗൂഗിള്‍ സ്കോളറില്‍ ഗവേഷകരെ കാത്തിരിക്കുന്നത്. വിലാസം : scholar.google.com
ഗൂഗിള്‍ മാപ്പ്സ് :-
ഭൂപടങ്ങള്‍ അനായാസം കണ്ടെത്താനും ഡൌണ്‍ലോഡ് ചെയ്യാനും ഉദ്ദേശിച്ച് രൂപപ്പെടുത്തിയ സര്‍വ്വീസ് ആണിത്. വിലാസം : maps.google.com
പിക്കാസ :-
ചിത്രങ്ങള്‍ ശേഖരിക്കാനും എഡിറ്റ് ചെയ്യാനും ഇമെയില്‍ ചെയ്യാനുമൊക്കെ സഹായിക്കുന്ന സൌജന്യ സോഫ്റ്റ് വെയര്‍ ആണിത്. picasa.google.com എന്ന വെബ് വിലാസത്തില്‍ നിന്ന് സൌജന്യമായി ഡൌണ്‍ലോഡ് ചെയ്യാം.
സ്കെച്ച് അപ് :-
ദ്വിമാന ചിത്രങ്ങളാണല്ലോ നമുക്ക് കൂടുതല്‍ പരിചയം. വീടുകളുടെയും കെട്ടിങ്ങളുടെയും മറ്റും ദ്വിമാന ചിത്രങ്ങള്‍ ഉപയോഗിച്ച് അനായാസമായി ത്രിമാന ചിത്രങ്ങള്‍ രൂപ്പെടുത്താന്‍ സഹായിക്കുന്ന ഗൂഗിളിന്‍റെ 'സ്കെച്ച് അപ്' എന്ന സോഫ്റ്റ് വെയര്‍ . സൌജന്യരൂപവും ഉണ്ട് കാശ് നല്‍കി വാങ്ങാവുന്ന മുന്തിയ വകഭേദവുമുണ്ട്. വിലാസം : sketchup.google.com
ഗൂഗിള്‍ ടോക്ക് :-
വിന്‍ഡോസ്, യാഹു മെസഞ്ചറിന് സമാനമായ സോഫ്റ്റ് വെയര്‍ ആണിത് ഇന്‍റര്‍നെറ്റ് വഴി എളുപത്തില്‍ സന്ദേശങ്ങള്‍ കൈമാറാനും സംസാരിക്കാനും മള്‍ട്ടീമിഡിയ ഫയലുകള്‍ കൈമാറാനും ഈ സോഫ്റ്റ് വെയര്‍ നമ്മെ സഹായിക്കും. google.com/talk എന്ന വെബ് വിലാസത്തില്‍ നിന്ന് സൌജന്യമായി ഡൌണ്‍ലോഡ് ചെയ്യാം.
ഗൂഗിള്‍ മലയാളം :-
ലോകത്തുള്ള ഡസന്‍കണക്കിന് (ഒട്ടുമിക്ക) ഭാഷകളിലും സെര്‍ച്ചിങ്ങ് നടത്താന്‍ ഗൂഗിള്‍ സൌകര്യം ഒരുക്കുന്നു. ഗൂഗിളിന്‍റെ മലയാളം വകഭേദത്തിലെത്താന്‍ google.com/intl/ml/ എന്നതാണ് വിലാസം.